ദുബായ്: ചില യൂറോപ്യൻ രാജ്യങ്ങൾ ഭക്ഷ്യ ഉൽപ്പന്നങ്ങളിൽ പ്രാണികളെ ചേർക്കാൻ അനുവദിച്ച പശ്ചാത്തലത്തിൽ യുഎഇയിൽ ഇത്തരം ഭക്ഷ്യ വസ്തുക്കളുണ്ടെന്ന പ്രചാരണവുമായി സോഷ്യൽ മീഡിയയും ചില മാധ്യമങ്ങളും രംഗത്തെത്തി. എന്നാൽ മാധ്യമങ്ങളിൽ പ്രചരിക്കുന്ന റിപ്പോർട്ടുകൾ തെറ്റാണെന്നും അത് പ്രചരിപ്പിക്കുന്നതിന് മുമ്പ് രാജ്യത്തെ ഔദ്യോഗിക അധികാരികളുമായി വിവരങ്ങൾ പരിശോധിക്കണമെന്നും മന്ത്രാലയം പൊതുജനങ്ങളോട് അഭ്യർത്ഥിച്ചു.
വെട്ടുകിളികളും തേനിൽ കാണപ്പെടുന്ന തേനീച്ചകളുടെ ഏതെങ്കിലും ആകസ്മിക ഭാഗങ്ങളും ഒഴികെ എല്ലാ പ്രാണികളെയും പുഴുക്കളെയും ഹലാൽ അല്ലാത്ത ഭക്ഷണമായാണ് യുഎഇ കണക്കാക്കുന്നതെന്നും യുഎഇയിൽ വിൽക്കുന്ന എല്ലാ ഭക്ഷ്യ ഉൽപന്നങ്ങളും പ്രാണികളില്ലാത്തതാണെന്നും കാലാവസ്ഥാ വ്യതിയാന പരിസ്ഥിതി മന്ത്രാലയം പ്രസ്താവനയിൽ വ്യക്തമാക്കി.
‘രാജ്യത്തെ വിപണികളിൽ വിൽക്കുന്ന എല്ലാ ഭക്ഷ്യ ഉൽപന്നങ്ങളും ആരോഗ്യ നിയന്ത്രണങ്ങളും അംഗീകൃത മാനദണ്ഡങ്ങളും പാലിക്കുന്നുണ്ടെന്ന് മന്ത്രാലയം സ്ഥിരീകരിക്കുന്നു, എല്ലാ ഭക്ഷ്യവസ്തുക്കളും ഇസ്ലാമിക ശരീഅത്തിന്റെ ഹലാൽ മാനദണ്ഡങ്ങൾ പാലിക്കുന്നുവെന്ന് ഉറപ്പുനൽകുന്നു- മന്ത്രാലയം അറിയിച്ചു. പ്രാണികളോ അവയുടെ അവശിഷ്ടങ്ങളോ അടങ്ങിയിരിക്കുന്ന ഏതൊരു ഭക്ഷ്യ ഉൽപന്നത്തിനും ‘ഹലാൽ’ സർട്ടിഫിക്കറ്റ് ഉണ്ടായിരിക്കണമെന്ന് വ്യവസ്ഥ ചെയ്തിട്ടുണ്ടെന്നും മന്ത്രാലയം വ്യക്തമാക്കി. ഇക്കാര്യം ഉറപ്പു വരുത്താൻ നിയോഗിക്കപ്പെട്ട ഏജൻസികൾ അക്കാര്യം പരിശോധിച്ചു ഉറപ്പുവരുത്തിയിട്ടുണ്ട്. ഇക്കാര്യത്തിൽ ആർക്കും ആശങ്ക വേണ്ടെന്നും മന്ത്രാലയം കൂട്ടിച്ചേർത്തു. പ്രോട്ടീന്റെ ഉത്ഭവം നിർണ്ണയിക്കാൻ കഴിയുന്ന അംഗീകൃത ഗവേഷണ കേന്ദ്രങ്ങളിൽ നടത്തുന്ന ലബോറട്ടറി പരിശോധനകളിലൂടെയാണ് ഇത് ചെയ്യുന്നത്.
ഈ ആഴ്ച ആദ്യം, യൂറോപ്യൻ യൂണിയൻ അംഗീകൃത ഭക്ഷണങ്ങളുടെ പട്ടികയിൽ പ്രാണികൾ അടങ്ങിയ ഉൽപ്പന്നങ്ങൾ ചേർത്തതിനു പിന്നാലെ ഖത്തറിൽ ഇത്തരം ഭക്ഷ്യ സാധനങ്ങൾ വിൽക്കുന്നതിന് വിലക്കേർപ്പെടുത്തിയിരുന്നു. ഇതേത്തുടർന്നാണ് യുഎഇയിലും ഇതുമായി ബന്ധപ്പെട്ട വിവാദം ഉയർന്നത്.
