കുവൈറ്റ് സിറ്റി: കുവൈറ്റില്‍ 11 ദിവസത്തിനിടെ നിയമലംഘകരായി കഴിയുന്ന 1,470 പ്രവാസികളെ നാടുകടത്തി. തൊഴില്‍ നിയമം, താമസനിയമം തുടങ്ങിയ നിയമലംഘനങ്ങളുടെ പേരിലാണ് നടപടി. ഇന്ത്യക്കാര്‍ വിവിധ രാജ്യങ്ങളില്‍ നിന്നുള്ള പ്രവാസികള്‍ നാടുകടത്തപ്പെട്ടവരില്‍ ഉള്‍പ്പെടുന്നു.
നിയമലംഘകരായി കഴിയുന്നവരെ കണ്ടെത്തുന്നതിന് രാജ്യത്തിന്റെ എല്ലാ ഭാഗത്തും പരിശോധന നടന്നുവരികയാണ്. പിടിക്കപ്പെടുന്ന വിദേശികളെ യാത്രാരേഖകള്‍ ലഭ്യമാവുന്ന മുറയ്ക്ക് അതാത് രാജ്യങ്ങളിലേക്ക് തിരിച്ചയക്കുകയാണ് ചെയ്യുന്നത്. ഇങ്ങനെ തിരിച്ചയക്കപ്പെട്ടവര്‍ക്ക് പുതിയ വിസയില്‍ രാജ്യത്തേക്ക് പ്രവേശനമുണ്ടാവില്ല.
കഴിഞ്ഞ 10 ദിവസത്തിനിടെ റെസിഡന്‍സി, തൊഴില്‍ നിയമ ലംഘകരായ 700 പേരെ റെസിഡന്‍സി അഫയേഴ്‌സ് ഇന്‍വെസ്റ്റിഗേഷന്‍ ഡിപ്പാര്‍ട്ട്‌മെന്റ് കസ്റ്റഡിയിലെടുത്തിട്ടുണ്ട്. നിയമലംഘകരെ കണ്ടെത്തുന്നതിനും തുടര്‍നടപടികള്‍ സ്വീകരിക്കുന്നതിനുമായി കുവൈറ്റിലെ എല്ലാ മേഖലകളിലും സുരക്ഷാ പരിശോധനകള്‍ ശക്തമാക്കുന്നതിനുള്ള തുടര്‍ച്ചയായ ശ്രമത്തിന്റെ ഭാഗമായാണിത്. തൊഴില്‍ മന്ത്രാലയം ഉള്‍പ്പെടെയുള്ള വിവിധ വിഭാഗങ്ങളുടെ സഹകരണത്തോടെ ആഭ്യന്തര മന്ത്രാലയം വിവിധ മേഖലകളില്‍ യോജിച്ച നടപടി സ്വീകരിച്ചതായി സുരക്ഷാ വൃത്തങ്ങളെ ഉദ്ധരിച്ച് അറബ് ടൈംസ് റിപ്പോര്‍ട്ട് ചെയ്തു.
2023ല്‍ 42,850 പ്രവാസികളെയാണ് അവരുടെ രാജ്യങ്ങളിലേക്ക് നാടുകടത്തിയത്. ആദ്യമായാണ് ഒരുവര്‍ഷം ഇത്രയും പേരെ കുവൈറ്റ് നാടുകടത്തുന്നത്. സുരക്ഷാ നടപടികളും പരിശോധനകളും വര്‍ധിപ്പിച്ചതോടെ പിടിക്കപ്പെട്ടവരുടെ എണ്ണം ഉയരുകയായിരുന്നു.
രാജ്യത്തിന്റെ നിയമങ്ങളും നിര്‍ദേശങ്ങളും ലംഘിച്ചതിനാല്‍ ഇവരില്‍ നിരവധി പേരെ കുവൈറ്റിലേക്ക് വീണ്ടും പ്രവേശിക്കുന്നതിന് വിലക്ക് ഏര്‍പ്പെടുത്തിയാണ് തിരിച്ചയച്ചത്. തൊഴില്‍-താമസ നിയമങ്ങള്‍ക്ക് പുറമേ മയക്കുമരുന്ന് കേസുകള്‍, മോഷണം, മദ്യനിര്‍മാണം, പൊതുനിയമങ്ങള്‍ പാലിക്കാതിരിക്കല്‍ തുടങ്ങിയ നിയമലംഘനങ്ങളുടെ പേരില്‍ നാടുകടത്തപ്പെട്ടവരും ഇതില്‍ ഉള്‍പ്പെടുന്നു.
