ദുബായ്: ഈ വർഷത്തെ ഹജ്ജ് തീർഥാടനത്തിന് അപേക്ഷ സമർപ്പിക്കുന്നതിനുള്ള തീയതികൾ പ്രഖ്യാപിച്ച് യുഎഇയും ഖത്തറും. യുഎഇയിിൽ നിന്ന് ഈ വർഷം ഹജ്ജ് തീർഥാടനം നിർവഹിക്കാൻ ആഗ്രഹിക്കുന്നവർക്ക് ഫെബ്രുവരി 13 മുതൽ മാർച്ച് 10 വരെ രജിസ്റ്റർ ചെയ്യാം.
തീർത്ഥാടകർ യുഎഇയുടെ ജനറൽ അതോറിറ്റി ഓഫ് ഇസ്ലാമിക് അഫയേഴ്സ് ആൻഡ് എൻഡോവ്മെന്റിന്റെ (ഔഖാഫ്) ഡിജിറ്റൽ പ്ലാറ്റ്ഫോം വഴിയാണ് രജിസ്റ്റർ ചെയ്യേണ്ടതെന്ന് അധികൃതർ അറിയിച്ചു. വിശുദ്ധ യാത്ര നടത്താൻ ഉദ്ദേശിക്കുന്നവർ ‘ഹജ്ജ് രജിസ്‌ട്രേഷൻ’ ടാബിൽ ക്ലിക്ക് ചെയ്യണം. തുടർന്ന് അവരുടെ എമിറേറ്റ്‌സ് ഐഡിയും മൊബൈൽ ഫോൺ നമ്പറും നൽകണം. മാർച്ച് 12 ആണ് അവസാന തീയതി.
ലോകമെമ്പാടുമുള്ള തീർഥാടകർക്ക് ഹജ്ജ് നിർവഹിക്കാനുള്ള അവസരം നൽകുന്നുവെന്ന് ഉറപ്പാക്കാൻ സൗദി അറേബ്യ ഓരോ രാജ്യത്തിനും ക്വാട്ട നിശ്ചയിച്ച് നൽകിയിട്ടുണ്ട്. ക്വാട്ട പരിമിതമായതിനാൽ ആദ്യം ബുക്ക് ചെയ്യുന്നവർക്ക് അനുമതി ലഭിക്കുമെന്ന് യുഎഇ സർക്കാർ അറിയിച്ചു. സാധാരണഗതിയിൽ, യുഎഇ ഗവൺമെന്റ് സ്വദേശികൾക്ക് മാത്രമാണ് ഹജ്ജിന് അനുമതി നൽകാറ്. തീർഥാടകർക്ക് ലൈസൻസുള്ള ടൂർ ഓപ്പറേറ്റർമാർ വാഗ്ദാനം ചെയ്യുന്ന ഹജ്ജ് പാക്കേജുകൾ തിരഞ്ഞെടുക്കാം.
ഈ വർഷത്തെ ഹജ്ജ് തീർഥാടകരുടെ എണ്ണത്തിൽ രാജ്യം നിയന്ത്രണങ്ങൾ ഏർപ്പെടുത്തില്ലെന്ന് സൗദി ഹജ്ജ് ഉംറ മന്ത്രാലയം നേരത്തേ പ്രഖ്യാപിച്ചിരുന്നു. ഇസ്ലാമിന്റെ വിശുദ്ധ സ്ഥലങ്ങളിൽ കൊവിഡുമായി ബന്ധപ്പെട്ട മൂന്ന് വർഷത്തെ നിയന്ത്രണങ്ങൾക്കു ശേഷമാണ് നിയന്ത്രണങ്ങളില്ലാതെ ഈ വർഷം ഹജ്ജിന് ആളുകളെ അനുവദിക്കുന്നത്. പ്രായപരിധിയില്ലാതെ തീർഥാടകരുടെ എണ്ണം പകർച്ചവ്യാധിക്ക് മുമ്പുള്ളതിലേക്ക് മടങ്ങുമെന്ന് ഹജ്ജ്, ഉംറ മന്ത്രി തൗഫീഖ് അൽ റാബിയ വല്യക്തമാക്കി.
ഇസ്ലാമിന്റെ പ്രധാന കർമങ്ങളിലൊന്നാണ് ഹജ്ജ്. സാമ്പത്തികവും ശാരീരികവുമായി ശേഷിയുള്ള എല്ലാ മുസ്ലിംകളും ഒരു തവണയെങ്കിലും അത് നിർവഹിക്കേണ്ടതുണ്ടെന്നാണ് മതശാസന. ഈ വർഷം ജൂണിലാണ് ഹജ്ജ് തീർത്ഥാടനത്തിന് തുടക്കമാവുക. 2019-ൽ 25 ലക്ഷത്തിലധികം ആളുകൾ പേർ ഹജ്ജ് തീർത്ഥാടനം നടത്തിയിരുന്നു. അതിനുശേഷം മൂന്ന് വർഷത്തിനുള്ളിൽ, കോവിഡ് സുരക്ഷാ നടപടിയെന്ന നിലയിൽ എണ്ണം ഗണ്യമായി കുറച്ചു. കഴിഞ്ഞ വർഷം ഏകദേശം 10 ലക്ഷത്തോളം പേർ ഹജ്ജ് നിർവഹിക്കാനെത്തിയിരുന്നു.
ഖത്തറിൽ നിന്നും ഹജ്ജിന് പോകാൻ ഫെബ്രുവരി 12 ഞായറാഴ്ച മുതൽ അപേക്ഷിക്കാം.ഖത്തർ മതകാര്യ മന്ത്രാലയമാണ് ഈ വർഷം ഖത്തറിൽ നിന്നും ഹജ്ജിന് പോകുന്നവർക്കുള്ള നിർദേശങ്ങൾ വ്യക്തമാക്കിയത്. അപേക്ഷകൻ രണ്ട് ഡോസ് കോവിഡ് 19 വാക്‌സിൻ എടുത്തിരിക്കണം. സ്വദേശികൽക്ക് 18 വയസ് പൂർത്തിയായിരിക്കണമെന്നും നിബന്ധനയുണ്ട്. അതേസമയം പ്രവാസികൾക്ക് 40 വയസ് പൂർത്തിയായിരിക്കണം. 10 വർഷമായി രാജ്യത്ത് താമസിക്കുന്നയാളാകണമെന്നും നിബന്ധനയുണ്ട്. അപേക്ഷ സ്വീകരിക്കുന്നതിന്റെ കാലാവധി കഴിഞ്ഞ് 10 ദിവസത്തിനകം ഹജ്ജിന് അർഹതയുള്ളവരുടെ പട്ടിക പ്രസിദ്ധീകരിക്കുമെന്നും മന്ത്രാലയം അറിയിച്ചു.
