ദുബായ്: ദുബായ്-അല്‍ ഐന്‍ റോഡ് മുതല്‍ ഷെയ്ഖ് മുഹമ്മദ് ബിന്‍ സായിദ് റോഡ് വരെ റാസല്‍ഖോര്‍ റോഡിലൂടെ എട്ട് കിലോമീറ്റര്‍ വ്യാപിച്ചുകിടക്കുന്ന ഷെയ്ഖ് റാഷിദ് ബിന്‍ സയീദ് കോറിഡോര്‍ വിപുലീകരണ പദ്ധതിയുടെ രണ്ടാമത്തെയും അവസാനത്തെയും ഘട്ടം പൂര്‍ത്തിയായി. ദുബായ് റോഡ്‌സ് ആന്‍ഡ് ട്രാന്‍സ്‌പോര്‍ട്ട് അതോറിറ്റി (ആര്‍ടിഎ) ഇന്ന് ഉദ്ഘാടനം ചെയ്ത് ഗതാഗതത്തിനായി തുറന്നുകൊടുത്തു. ആകെ രണ്ട് കിലോമീറ്റര്‍ നീളം വരുന്ന നാല് പാലങ്ങളുടെ നിര്‍മ്മാണവും പൂര്‍ത്തിയായി.
രണ്ട് ഘട്ടങ്ങളിലായാണ് പദ്ധതി നടപ്പാക്കിയത്. റാസല്‍ഖോര്‍ റോഡ് ഓരോ ദിശയിലും മൂന്നു മുതല്‍ നാലു വരെ വരിയായി വീതികൂട്ടുകയും ഇരുവശങ്ങളിലും രണ്ടുവരി സര്‍വീസ് റോഡ് നിര്‍മിക്കുകയും ചെയ്യുന്നതായിരുന്നു ആദ്യഘട്ടം. നിലവിലുള്ള ഓവര്‍ലാപ്പ് ട്രാഫിക് സ്‌പോട്ടുകള്‍ ഒഴിവാക്കി ഗതാഗത സുരക്ഷ ഉറപ്പാക്കുകയും വാഹനങ്ങളുട സുഗമമായ സഞ്ചാരം ഉറപ്പാക്കുന്നതിനുള്ള നടപടി സ്വീകരിക്കുകയും ചെയ്തു. ഇത് റോഡിന്റെ ശേഷി മണിക്കൂറില്‍ 10,000 വാഹനങ്ങളായി ഉയര്‍ത്തുകയും യാത്രാ സമയം 20 മിനിറ്റില്‍ നിന്ന് ഏഴ് മിനിറ്റായി കുറയ്ക്കുകയും ചെയ്യും.
പ്രാരംഭ ഘട്ടത്തില്‍ രണ്ട് പ്രധാന പാലങ്ങളും നിര്‍മിച്ചിരുന്നു. മണിക്കൂറില്‍ 7,500 വാഹനങ്ങള്‍ ഉള്‍ക്കൊള്ളാന്‍ ശേഷിയുള്ള ദുബായ്-അല്‍ ഐന്‍ റോഡില്‍ നിന്നും കിഴക്കോട്ട് ദുബായ് ക്രീക്ക് ഹാര്‍ബറിലേക്ക് പോകുന്ന അല്‍ ഖൈല്‍ റോഡില്‍ നിന്നും വരുന്ന വാഹനങ്ങള്‍ക്ക് പോകുന്നതിന് 740 മീറ്റര്‍ നീളത്തില്‍ മൂന്നുവരി പാലമാണ് ആദ്യത്തേത്. ദുബായ് ക്രീക്ക് ഹാര്‍ബറില്‍ നിന്ന് റാസല്‍ഖോര്‍ഹത്ത റോഡിലേക്ക് വരുന്ന വാഹനങ്ങള്‍ക്കായി മണിക്കൂറില്‍ 3,100 വാഹനങ്ങളുടെ ശേഷിയുമുള്ള രണ്ട് വരിപ്പാലമാണ് രണ്ടാമത്തേത്. പുതുതായി വികസിപ്പിച്ച പ്രദേശങ്ങളിലേക്ക് സര്‍വീസ് നടത്തുന്നതിനും നദ്ദ് അല്‍ ഹമര്‍ റോഡിന്റെയും റാസല്‍ ഖോര്‍ റോഡിന്റെയും കവലയില്‍ നിന്നുള്ള ഗതാഗതം സുഗമമാക്കുന്നതിനും ഓരോ ദിശയിലും നാല് വരികളുള്ള പുതിയ അഞ്ച് കിലോമീറ്റര്‍ റോഡും എന്‍ട്രി, എക്‌സിറ്റ് പോയിന്റുകളും നിര്‍മിച്ചുവരികയാണ്.
രണ്ടാമത്തെയും അവസാനത്തെയും ഘട്ടത്തില്‍ നദ്ദ് അല്‍ ഹമര്‍ റോഡിന്റെയും റാസല്‍ ഖോര്‍ റോഡിന്റെയും കവലയുടെ ശേഷി വര്‍ധിപ്പിച്ച് 988 മീറ്റര്‍ നീളത്തില്‍ രണ്ടുവരിപ്പാലം നിര്‍മ്മിച്ചു. ദുബായ്-അല്‍ ഐന്‍ റോഡിന്റെ ദിശയില്‍ നദ്ദ് അല്‍ ഹമര്‍ റോഡില്‍ നിന്ന് റാസല്‍ ഖോര്‍ റോഡിലേക്ക് വരുന്ന വാഹനങ്ങള്‍ക്കായി 115 മീറ്റര്‍ നീളമുള്ള മറ്റൊരു രണ്ട് വരിപ്പാലത്തിന്റെ നിര്‍മാണവും വലത്തോട്ട് പോകുന്ന 368 മീറ്റര്‍ രണ്ട് വരി അടിപ്പാതയും ഇതില്‍ ഉള്‍പ്പെടുന്നു. കൂടാതെ, നിലവിലുള്ള ജംഗ്ഷന്‍ മെച്ചപ്പെടുത്തുകയും നിലവിലുള്ള വളവുകള്‍ വീതികൂട്ടുകയും ചെയ്തു. ഷെയ്ഖ് റാഷിദ് ബിന്‍ സയീദ് കോറിഡോര്‍ മെച്ചപ്പെടുത്തല്‍ പദ്ധതി ആര്‍ടിഎ ഏറ്റെടുത്ത മെഗാ പദ്ധതികളിലൊന്നാണ്.
