ഷാര്‍ജ: യുഎഇയിലെ ഷാര്‍ജയില്‍ ബഹുനില കെട്ടിടത്തിലുണ്ടായ തീപിടുത്തത്തില്‍ അഞ്ചു പേര്‍ മരിച്ചു. 44 പേര്‍ക്ക് പരിക്കേറ്റു. സാരമായി പരിക്കേറ്റ 17 പേര്‍ ചികിത്സയിലാണ്. അപകടത്തില്‍ പെട്ടവരുടെ വിശദാംശങ്ങള്‍ ലഭ്യമായിട്ടില്ല.
ഷാര്‍ജ എമിറേറ്റിലെ അല്‍നഹ്ദയിലാണ് തീപിടിത്തമുണ്ടായത്. 39 നിലയുള്ള താമസ കെട്ടിടത്തിന്റെ മുകള്‍ ഭാഗത്താണ് തീ പടര്‍ന്നത്. വ്യാഴാഴ്ച രാത്രി 10.50 ഓടെയാണ് സംഭവം.
തീ പടര്‍ന്നയുടന്‍ താമസക്കാരെ കെട്ടിടത്തില്‍ നിന്ന് ഒഴിപ്പിച്ചിരുന്നു. അപകട സ്ഥലത്ത് കുതിച്ചെത്തിയ രക്ഷാപ്രവര്‍ത്തകര്‍ തീയണക്കാനുളള നടപടി സ്വീകരിക്കുകയും ചെയ്തു.
വിവിധ രാജ്യക്കാരായ ആളുകള്‍ കെട്ടിടത്തില്‍ താമസിച്ചുവരികയായിരുന്നു. കെട്ടിടത്തിലുണ്ടായിരുന്ന 156 പേരെ എമിറേറ്റ്‌സ് റെഡ് ക്രസന്റിന്റെ സഹായത്തോടെ സുരക്ഷിതമായി ഹോട്ടലുകളിലേക്ക് മാറ്റി. തീപിടുത്തത്തിന്റെ കാരണം പുറത്തുവന്നിട്ടില്ല.
