കല്‍പ്പറ്റ: രാഹുല്‍ഗാന്ധി വയനാട്ടില്‍ തന്നെ മത്സരിക്കണമെന്നത് പ്രവര്‍ത്തകരുടെയും, ജനങ്ങളുടെയും ആഗ്രഹമാണെന്നും അത് നടക്കുമെന്ന് തന്നെയാണ് പ്രതീക്ഷിക്കുന്നതെന്നും അഡ്വ. ടി സിദ്ധിഖ് എംഎല്‍എ കല്‍പ്പറ്റയില്‍ നടത്തിയ വാര്‍ത്താസമ്മേളനത്തില്‍ പറഞ്ഞു. രാഹുല്‍ഗാന്ധിയുടെ അയോഗ്യതാ നടപടി നീക്കിയ സാഹചര്യത്തില്‍ ഉടന്‍തന്നെ അദ്ദേഹം വയനാട്ടിലെത്തുമെന്നും, അദ്ദേഹത്തിന് വന്‍സ്വീകരണം നല്‍കുമെന്നും സിദ്ധിഖ് പറഞ്ഞു. തിയ്യതിയുടെ കാര്യത്തില്‍ ഉടന്‍ തീരുമാനവും. ഇതുവരെ ജില്ല കണ്ടിട്ടില്ലാത്ത വീരോചിതമായ സ്വീകരണത്തിനായിരിക്കും വയനാട് സാക്ഷ്യം വഹിക്കുക.

ഇന്ത്യയെ തിരിച്ചുപിടിക്കാനുള്ള ഇന്ത്യാ മൂവ്‌മെന്റിന് നേതൃത്വം നല്‍കുന്ന രാഹുല്‍ഗാന്ധിക്കുള്ള ആദ്യത്തെ വിജയമായി ഈ സുപ്രീംകോടതി വിധിയും സ്വീകരണവും മാറ്റാനുള്ള തയ്യാറെടുപ്പിലാണെന്നും സിദ്ധിഖ് പറഞ്ഞു. സുപ്രീംകോടതി വിധിയോടും ഭരണഘടനയോടും രാഷ്ട്രീയ മര്യാദയുണ്ടെങ്കില്‍ എത്രയും വേഗം രാഹുല്‍ഗാന്ധിയുടെ എംപി സ്ഥാനം പുനസ്ഥാപിക്കണമെന്നും എംഎല്‍എ ആവശ്യപ്പെട്ടു. എത്രയും വേഗം അദ്ദേഹത്തിന്റെ എംപിയെന്ന അംഗത്വം പുനസ്ഥാപിക്കുകയെന്നത് വയനാട്ടിലെ ജനങ്ങളുടെ ആവശ്യമാണ്. കോടതി വിധിയുടെ പശ്ചാത്തലത്തില്‍ രാഹുല്‍ഗാന്ധിയെ പുറത്താക്കാന്‍ ലോക്‌സഭാ സെക്രട്ടറിയേറ്റിന് വലിയ തിടുക്കമുണ്ടായിരുന്നു. എന്നാല്‍ സുപ്രീംകോടതി വിധി വന്നിട്ടും ആ തിടുക്കവും വേഗതയും അദ്ദേഹത്തിന്റെ അംഗത്വം പുനസ്ഥാപിക്കുന്നതില്‍ ഉണ്ടാകുന്നില്ല.

രാഹുല്‍ഗാന്ധിയെ ഒരു ദിവസമെങ്കിലും പാര്‍ലമെന്റില്‍നിന്നും മാറ്റി നിര്‍ത്താന്‍ മോദി ആഗ്രഹിക്കുന്നത് അദ്ദേഹത്തെ ഭയന്നിട്ടാണ്. എന്നാല്‍ രാഹുല്‍ഗാന്ധിയെ നയിക്കുന്നത് ഭയമല്ല, ഭരണഘടനയാണെന്നും അദ്ദേഹം പറഞ്ഞു. സുപ്രീംകോടതി പരമാവധി ശിക്ഷ കൊടുക്കാന്‍ തീരുമാനിക്കുന്നത് ഒരു ദിവസം കുറഞ്ഞിരുന്നെങ്കില്‍ അദ്ദേഹത്തിന്റെ അംഗത്വം റദ്ദാവില്ലായിരുന്നു. അതുകൊണ്ടുതന്നെ അദ്ദേഹത്തെ എംപി സ്ഥാനത്തുനിന്നും പുറത്താക്കുകയെന്നതായിരുന്നു ലക്ഷ്യം. സുപ്രീംകോടതിയുടെ ചോദ്യവും എന്തിനായിരുന്നു പരമാവധി ശിക്ഷ നല്‍കിയത് എന്നായിരുന്നു. ഈ കേസില്‍ രണ്ടുമാസമാണ് സെഷന്‍സ് കോടതി വിധി പറയാന്‍ മാറ്റി വെച്ചത്. രാഹുല്‍ഗാന്ധിക്ക് നീതി കിട്ടാന്‍ കേസ് ഗുജറാത്തിന് പുറത്തെത്തേണ്ടി വന്നുവെന്നും അദ്ദേഹം ചൂണ്ടിക്കാട്ടി.

മണിപ്പൂര്‍ കലാപത്തില്‍ രാജ്യവ്യാപകമായ പ്രതിഷേധങ്ങളുണ്ടായിട്ടും, ആക്രമണങ്ങളെ അടിച്ചമര്‍ത്തുന്നതിനായി ചെറുവിരല്‍ പോലുമനക്കാത്ത ബീരേന്‍സിംഗ് സര്‍ക്കാരിനെ പിരിച്ചുവിടണമെന്നും, ക്രൈസ്തവ ന്യൂനപക്ഷങ്ങള്‍ക്കെതിരായിട്ടുള്ള വംശീയ അതിക്രങ്ങള്‍ അടിയന്തരമായി അവസാനിപ്പിക്കണമെന്നും കേന്ദ്രസര്‍ക്കാര്‍ കുറ്റവാളികള്‍ക്കെതിരെ നടപടി യെടുക്കുകയും, നിയമവാഴ്ച ഉറപ്പ് വരുത്തുന്നതിനും പുനരധിവാസം ഉറപ്പുവരുത്തണമെന്നും ആവശ്യപ്പെട്ടുകൊണ്ട് ഞായറാഴ്ച കല്‍പ്പറ്റയില്‍ ജനാധിപത്യ സാംസ്‌ക്കാരിക പ്രതിരോധവും ലൈറ്റ് മാര്‍ച്ചും നടക്കുമെന്നും അഡ്വ. ടി സിദ്ധിഖ് എം എല്‍ എ വാർത്താ സമ്മേളനത്തിൽഅറിയിച്ചു.

ഉച്ചയ്ക്കുശേഷം മൂന്നരക്ക് കല്‍പ്പറ്റ നഗരസഭാ പരിസരത്തുനിന്നും ആരംഭിക്കുന്ന ലൈറ്റ് മാര്‍ച്ച് പുതിയ സ്റ്റാന്റ് ചുറ്റി പൊതുസമ്മേളനം നടക്കുന്ന കല്‍പ്പറ്റ എച്ച് ഐ എം യു പി സ്‌കൂള്‍ പരിസരത്ത് അവസാനിക്കും. പൊതുസമ്മേളനം പ്രമുഖ സാഹിത്യകാരന്‍ കല്‍പ്പറ്റ നാരായണന്‍ ഉദ്ഘാടനം ചെയ്യും. ചടങ്ങില്‍ രാഷ്ട്രീയ, സാമൂഹ്യ, മത, സാംസ്‌ക്കാരിക മേഖലകളിലെ പ്രമുഖര്‍ പരിപാടിയില്‍ പങ്കെടുക്കും. കഴിഞ്ഞ മൂന്നുമാസമായി മണിപ്പൂരില്‍ ക്രൈ സ്തവ ന്യൂനപക്ഷങ്ങള്‍ ക്കെതിരെ നടക്കുന്ന വംശീയ കലാപം നിര്‍ലജ്ജം തുടരുകയാണ്. ഇന്ത്യന്‍ ഭരണഘടന ഉറപ്പുനല്‍കുന്ന ജീവനും സ്വത്തിനും സംരക്ഷണം നല്‍കണമെന്നുള്ള ഭരണഘടന ഉത്തരവാദിത്വം പോലും പാലിക്കാതെ യാണ് നരേന്ദ്രമോദി നേതൃത്വം കൊടുക്കുന്ന കേന്ദ്ര സര്‍ക്കാരും ബീരേന്‍ സിംഗിന്റെ നേതൃത്വത്തിലുള്ള മണിപ്പൂര്‍ സര്‍ക്കാരും മുന്നോട്ടുപോകുന്നതെന്നും അദ്ദേഹം പറഞ്ഞു.

ഇപ്പോഴും നിഷ്ഠൂര കൊലപാതകങ്ങളും കൊള്ളിവെപ്പുകളും മണിപ്പൂരിന്റെ തെരുനില്‍ തുടരുന്നുവെന്ന് മാത്രമല്ല, സ്ത്രീകളെയും നിരാലംബരെയും ഉള്‍പ്പെടെ നഗ്നരാക്കി ജനമധ്യത്തിലൂടെ വലിച്ചിഴക്കപ്പെടുന്ന ദൃശ്യങ്ങള്‍ ഹൃദയവേദനയോടെ മാത്രമെ കാണാനാവൂ എന്നും അദ്ദേഹം പറഞ്ഞു. ഈ സാഹചര്യത്തില്‍ രാജ്യവ്യാപകമായി നടന്നുകൊണ്ടിരിക്കുന്ന പ്രതിഷേധങ്ങളുടെകൂടി ഭാഗമായാണ് കല്‍പ്പറ്റയില്‍ ഇത്തരത്തിലൊരു സാംസ്‌ക്കാരിക പ്രതിരോധവും, മൊബൈല്‍ ലൈറ്റുകള്‍ തെളിച്ചുകൊണ്ട് മാര്‍ച്ചും നടത്തുന്നതെന്നും അദ്ദേഹം കൂട്ടിച്ചേര്‍ത്തു.