ദുബായ്: സൂഫി സംഗീതത്തിന്റെ ആത്മീയതയും പ്രണയഭാവങ്ങളും തന്റെ ഹൃദയസ്പർശിയായ ശബ്ദത്തിലൂടെ അനുഭവമാക്കി മാറ്റുന്ന കെ.എച്ച്. താനൂർ, ഇപ്പോള്‍ യുഎഇയിലെ സംഗീത സദസ്സുകളെ മതിമറയ്ക്കുകയാണ്. ആയിരത്തിലധികം കവാലി ഗാനങ്ങൾ രചിക്കുകയും ആലപിക്കുകയും സംഗീതം പകരുകയും ചെയ്ത ഈ പ്രതിഭ, പ്രവാസ ലോകത്ത് കഴിഞ്ഞ ദിവസങ്ങളിൽ നടന്ന ഈദ് ആഘോഷങ്ങളിൽ പങ്കാളിയായി തന്റെ ശബ്ദമാധുര്യത്തിൽ ആരാധകരെ സഞ്ചരിപ്പിച്ചു.

13ാം വയസ്സിൽ സംഗീത ലോകത്ത് കാൽവെച്ച താനൂർ സ്വദേശി ഹനീഫ ഇന്ന് ‘കെ.എച്ച്. താനൂർ’ എന്ന പേരിൽ കേരളത്തിലെ സൂഫി കവാലി വേദികളിൽ അനവധി ആരാധകരുള്ള അപൂർവ കലാകാരനാണ്. ഗായകൻ, സംഗീതജ്ഞൻ, നല്ലൊരു ഹാർമോണിസ്റ്റ്, കവിതാകാരൻ, രചയിതാവ് – ഒരു സർഗ്ഗാത്മകയാത്രയുടെ എല്ലാ രംഗങ്ങളിലും തന്റേതായ മുദ്ര പതിപ്പിച്ച അദ്ദേഹം, പുതിയ അനുഭവങ്ങളുമായി പ്രവാസ ലോകത്തേയും വിസ്മയിപ്പിക്കുന്നു.

‘അവതുണ്ടാവും കാലം…. അല്ലലില്ലാത്ത നേരം ’,…, നിന്നെ കാണാത്ത കണ്ണ് കണ്ണല്ല…’,…’, അദമിയായ കൂട്ടിനുള്ളിൽ…’ തുടങ്ങി അനവധി ഹൃദയസ്പർശികളായ ഗാനങ്ങൾ രചിച്ചതും സംഗീതം പകർന്നതും താനൂരാണെന്നു പലർക്കും അറിയില്ല. ആലാപനത്തിലൂടെ ആത്മീയ ഉന്മേഷം ഉണർത്തുകയും, ഓരോ കൃതിയിലൂടെയും ആത്മാവ് സ്പർശിക്കുന്ന സന്ദേശങ്ങൾ കൈമാറുകയും ചെയ്യുന്നതാണ് താനൂരിന്റെ പ്രത്യേകത.

യുഎഇ സന്ദർശനത്തിന്റെ ഭാഗമായുള്ള വിവിധ ഗൃഹാന്തര മെഹ്ഫിൽ വേദികളിലും സംരംഭങ്ങളിലും താനൂർ അവതരിപ്പിച്ച സംഗീത പരിപാടികൾ പ്രേക്ഷകരെ ഹൃദയത്തിൽ തൊട്ടു. സൂഫി കവാലിയുടെ ശൈലി പ്രദർശിപ്പിക്കുന്നതിൽ മാത്രം ഒതുങ്ങാതെ, അതിന്റെ ആത്മസാരവും ഭാവങ്ങളുടെയും ആഴവുമാണ് താനൂരിന്റെ സംഗീതം വഴി ഉയർന്നുനിൽക്കുന്നത്.

പ്രവാസ ലോകത്തേക്കുള്ള ഈ ഹ്രസ്വ സംഗീതയാത്ര താനൂർ ഏറ്റെടുത്തത്, സൂഫി സന്ദേശം കൂടുതൽ ഹൃദയങ്ങളിൽ പതിപ്പിക്കാനും സംഗീതത്തിൽ ആത്മീയമായ അനുഭവം നൽകാനുമാണ്. ഒരു മനോഹര സംഗീത യാനത്തിലൂടെ കേൾവിക്കാരെ മറ്റൊരു ലോകത്തിലേക്ക് ചേർക്കുന്ന ഈ കലാകാരന്‍ പ്രവാസ സംഗീതരംഗത്ത് ഏറെ ശ്രദ്ധേയനാകുകയാണ് ഇപ്പോൾ. ടി പി ആലിക്കുട്ടി ഗുരുക്കൾ, ആലപ്പി ഷെരീഫ് തുടങ്ങിയവരാണ് കലാരംഗത്തെ പ്രധാന ഗുരുനാഥന്മാർ.അദ്ദേഹത്തെ കഴിഞ്ഞ ദിവസം ദുബായ് കെഎംസിസി സംസ്ഥാന പ്രസിഡണ്ട് ഡോ.അൻവർ അമീനിന്റെ സാന്നിധ്യത്തിൽ,ഡോ. അബ്ദുസ്സലാമും ഷംസുദ്ദീൻ നെല്ലറയും ചേർന്ന് ആദരിച്ചു. യുഎഇ നമ്പർ :0581462271

ഹിജ്‌റ വർഷം 1447 ന്റെ ആരംഭം കുറിക്കുന്ന ഇസ്ലാമിക പുതുവത്സരത്തോടനുബന്ധിച്ച് ജൂൺ 27 വെള്ളിയാഴ്ച യുഎഇ സർക്കാർ ഔദ്യോഗികമായി പൊതു അവധിയായി പ്രഖ്യാപിച്ചു.ഫെഡറൽ അതോറിറ്റി ഫോർ ഗവൺമെന്റ് ഹ്യൂമൻ റിസോഴ്‌സസ് (എഫ്എഎച്ച്ആർ) പ്രഖ്യാപനം പൊതുമേഖലാ ജീവനക്കാർക്ക് ബാധകമാണ്, അവർക്ക് 3 ദിവസത്തെ നീണ്ട വാരാന്ത്യം അനുവദിച്ചു.

ജൂൺ 30 തിങ്കളാഴ്ച മുതൽ സാധാരണ പ്രവൃത്തി സമയം പുനരാരംഭിക്കുമെന്ന് പ്രതീക്ഷിക്കുന്നു.

ഇസ്ലാമിക്, അല്ലെങ്കിൽ ഹിജ്രി, കലണ്ടർ ചാന്ദ്ര മാസങ്ങളെ അടിസ്ഥാനമാക്കിയുള്ളതാണ്, കലണ്ടറിലെ ആദ്യ മാസമായ മുഹറത്തിന്റെ ഒന്നാം ദിവസമാണ് പുതുവത്സരം ആരംഭിക്കുന്നത്.

കോഴിക്കോട്: പ്രമുഖ ടെലികോം സേവനദാതാവായ റിലയന്‍സ് ജിയോയുടെ സേവനങ്ങള്‍ തടസപ്പെട്ടു. തിങ്കളാഴ്ച ഉച്ചയ്ക്ക് രണ്ടുമണിയോടെയാണ് ഉപഭോക്താക്കളില്‍നിന്ന് വ്യാപകമായ പരാതി ഉയര്‍ന്നത്. മൊബൈല്‍ ഇന്റര്‍നെറ്റും കോളിങ്ങും ഉള്‍പ്പെടെയുള്ള സേവനങ്ങളാണ് തടസപ്പെട്ടത്.

ഡൗണ്‍ ഡിറ്റക്ടറില്‍ നിരവധി ഉപഭോക്താക്കളാണ് ജിയോ സേവനം തടസപ്പെട്ടതായി റിപ്പോര്‍ട്ട് ചെയ്തിരിക്കുന്നത്. മൊബൈല്‍ ഇന്റര്‍നെറ്റ് സേവനം തടസപ്പെട്ടതായാണ് ഭൂരിഭാഗം പേരും അറിയിച്ചത്. ജിയോ ഫൈബര്‍ സേവനം തടസപ്പെട്ടതായും പലരും റിപ്പോര്‍ട്ട് ചെയ്തിട്ടുണ്ട്.

എന്താണ് സംഭവിച്ചത് എന്നറിയാതെ പരിഭ്രാന്തരായ ഉപഭോക്താക്കള്‍ ഫെയ്‌സ്ബുക്ക്, എക്‌സ് ഉള്‍പ്പെടെയുള്ള സാമൂഹിക മാധ്യമങ്ങളില്‍ പോസ്റ്റുകള്‍ പങ്കുവെച്ചു. അതേസമയം നെറ്റ്‌വര്‍ക്കിലെ തടസത്തെ കുറിച്ച് ജിയോ ഔദ്യോഗികമായി ഇതുവരെ പ്രതികരിച്ചിട്ടില്ല.