ദുബായ്: ഈദ് അൽ അദ്ഹയോടനുബന്ധിച്ച് ദുബായിയുടെ വികസന മുന്നേറ്റത്തിന് വിലപ്പെട്ട സംഭാവനകൾ അർപ്പിച്ച തൊഴിലാളികൾക്കായി മെഗാ ഈദ് ആഘോഷം സംഘടിപ്പിക്കുന്നു. ഒന്നാം പെരുന്നാൾ ദിനമായ ജൂൺ 6 നും, ജൂൺ 7 ശനിയാഴ്ചയും ദുബായ് അൽ ഖൂസിലാണ് “സെലിബ്രേറ്റ് ഈദ് അൽ അദ്ഹ 2025 വിത്ത് അസ്!” എന്ന പേരിൽ വിപുലമായ ആഘോഷ പരിപാടികൾ ഒരുക്കിയിരിക്കുന്നത്. ജനറൽ ഡയറക്ടറേറ്റ് ഓഫ് ഐഡന്റിറ്റി ആൻഡ് ഫോറിനേഴ്സ് അഫയേഴ്സാണ് ചടങ്ങ് സംഘടിപ്പിക്കുന്നത്.ബോളിവുഡ് താരങ്ങൾ അതിഥികളായി എത്തുന്ന ഈ പരിപാടി ദുബായിലെ തൊഴിലാളികൾക്കായി സർക്കാർ നടത്തുന്ന ഏറ്റവും വലിയ വിനോദ കലാ പരിപാടിയാണ്. തൊഴിലാളികളോടുള്ള ആദരസൂചകമായാണ് ഈ ആഘോഷമെന്ന് ജിഡിആർഎഫ്എ ദുബായ് അസിസ്റ്റന്റ് ഡയറക്ടർ മേജർ ജനറൽ ഉബൈദ് മുഹൈർ ബിൻ സുറൂർ വ്യക്തമാക്കി.

ഇത്തവണ ഓൺലൈനിലും ഓഫ്‌ലൈനിലും പരിപാടികൾ നടക്കും. ഉച്ച മുതൽ വൈകുന്നേരം 6 മണി വരെ നടക്കുന്ന ഓൺലൈൻ പരിപാടിയിൽ ആളുകൾക്ക് കലാപ്രകടനങ്ങൾ തത്സമയം കാണാം. ലൈവ് കാണുന്ന കാഴ്ചക്കാർക്ക് റാഫിൾ ഡ്രോയിൽ പങ്കെടുക്കാൻ സുവർണ്ണാവസരമുണ്ട്. വിമാന ടിക്കറ്റുകൾ, സ്വർണ്ണ നാണയങ്ങൾ, മൊബൈൽ ഫോണുകൾ, 500 ദിർഹത്തിന്റെ വൗച്ചറുകൾ എന്നിവയുൾപ്പെടെ നിരവധി സമ്മാനങ്ങൾ ഇതിലൂടെ നേടാൻ സാധിക്കും. റാഫിൾ ഡ്രോയിൽ പങ്കെടുക്കുന്നതിന് ഡിപ്പാർട്ട്മെന്റ് പുറത്തിറക്കിയ ബ്രോഷറിലെ ക്യു.ആർ കോഡിൽ വെള്ളിയാഴ്ച മൊബൈൽ നമ്പർ നൽകി രജിസ്റ്റർ ചെയ്യാൻ കഴിയും.

തുടർന്ന് വൈകുന്നേരം 6 മണി മുതൽ രാത്രി 11 മണി വരെ അൽ ഖൂസിലെ പ്രത്യേക സജ്ജമാക്കിയ ഗ്രൗണ്ടിൽ തത്സമയ കലാപരിപാടികൾ അരങ്ങേറും. ഭാംഗ്രാ നൃത്തം, ബോളിവുഡ് താരങ്ങളുടെ കലാ പ്രകടനങ്ങൾ, വിവിധ ഷോകൾ, സ്റ്റിൽറ്റ് വാക്കർമാർ, സൈക്കിൾ ഷോകൾ, ഫയർ ഷോകൾ തുടങ്ങി നിരവധി വിനോദപരിപാടികൾ ഇവിടെയുണ്ടാകും. കൂടാതെ, ഒരു കാർ ഉൾപ്പെടെയുള്ള ആകർഷകമായ സമ്മാനങ്ങൾ നേടാനുള്ള കൂടുതൽ അവസരങ്ങളും തത്സമയ പരിപാടിയിലുണ്ടാകും. ഈ ബൃഹത്തായ ആഘോഷം തൊഴിലാളികൾക്ക് മറക്കാനാവാത്ത അനുഭവമായിരിക്കുമെന്ന് ജി ഡി ആർ എഫ് എ അറിയിച്ചു

പിസിഎൽഎ, തഖ്ദീർ അവാർഡ് എന്നിവരുടെ സഹകരണത്തോടെയാണ് ഈ പ്രത്യേക ഈദ് ഇവന്റ് സംഘടിപ്പിക്കുന്നത്. ഡു, മലബാർ ഗോൾഡ് & ഡയമണ്ട്സ്, അൽ ഫാറ്റൻ, ഫ്ലൈ ദുബായ് എന്നിവരാണ് പരിപാടിക്ക് പിന്തുണ നൽകുന്നത്. ഈ അവിസ്മരണീയമായ ഈദ് ആഘോഷത്തിൽ തൊഴിലാളികൾക്ക് പങ്കെടുത്ത് ആസ്വദിക്കാനുള്ള മികച്ച അവസരമാണിതെന്നും, ആഘോഷം തൊഴിലാളികളെ പിന്തുണക്കുന്നതിനും അവരുടെ ജീവിതത്തിൽ സന്തോഷം കൊണ്ടുവരുന്നതിനുള്ള നടപടികളിൽ ഒന്നാണെന്ന് കേണൽ ഒമർ മത്താർ അൽ മുസൈന പറഞ്ഞു. സേവന വിതരണത്തിനപ്പുറം ക്ഷേമം മെച്ചപ്പെടുത്തുന്നതിനും കൃതജ്ഞതയും നവീകരണവും പ്രോത്സാഹിപ്പിക്കുന്നതിനും, ഭാവിയിലേക്കുള്ള ചിന്താഗതിയും അനുകമ്പയും ഉള്ള ഒരു ആഗോള നഗരം എന്ന നിലയിൽ ദുബായുടെ പ്രശസ്തി ശക്തിപ്പെടുത്തുന്നതിന് ലക്ഷ്യമിട്ടുള്ള ജിഡിആർഎഫ്എ ദുബായുടെ വിശാലമായ സാമൂഹിക ഉത്തരവാദിത്ത ശ്രമങ്ങളുടെ ഭാഗമായാണ് ഈ സംരംഭം.

ഈ വർഷം മേയ് 29 മുതൽ യുഎഇയിൽ പ്രാബല്യത്തിൽ വന്ന പുതിയ മാധ്യമ നിയമമനുസരിച്ച് മത വിശ്വാസത്തെ അപമാനിക്കുന്നത് മുതൽ ലൈസൻസില്ലാതെ പ്രവർത്തിക്കുന്നത് വരെയുള്ള നിയമ ലംഘനങ്ങൾക്ക് 1 മില്യൺ ദിർഹം വരെ പിഴ ചുമത്തുമെന്ന് അധികൃതർ മുന്നറിയിപ്പ് നൽകി. നിയമ ലംഘനം ആവർത്തിക്കുന്നതിനനുസരിച്ച് പിഴയിലും വ്യത്യാസം ഉണ്ടാകും.

മതപരവും ധാർമികവുമായ ലംഘനങ്ങൾ:, ഇസ്‌ലാമിക വിശ്വാസങ്ങളെയോ, മറ്റ് മതങ്ങൾ, അവയുടെ വിശ്വാസങ്ങൾ എന്നിവയെയോ അപമാനിച്ചാൽ 10,00,000 ദിർഹം വരെ. പൊതു ധാർമികത ലംഘിക്കൽ, വിനാശകരമായ ആശയങ്ങൾ പ്രോത്സാഹിപ്പിക്കൽ എന്നിവയ്ക്ക് 100,000 ദിർഹം വരെ. കുറ്റകൃത്യങ്ങൾക്ക് പ്രേരിപ്പിക്കുന്ന ഉള്ളടക്കം ( കൊലപാതകം, ബലാത്സംഗം, മയക്കുമരുന്ന് ദുരുപയോഗം) പ്രസിദ്ധീകരിക്കുകയോ പ്രചരിപ്പിക്കുകയോ ചെയ്താൽ 150,000 ദിർഹം വരെ.

രാഷ്ട്ര, ദേശീയ താത്പര്യങ്ങൾ ഭരണ സംവിധാനത്തെയോ, ദേശീയ ചിഹ്നങ്ങളെയോ, രാജ്യത്തിന്‍റെ ഔദ്യോഗിക സ്ഥാപനങ്ങളെയോ അപമാനിച്ചാൽ 50,000 മുതൽ 500,000 ദിർഹം വരെ.രാജ്യത്തിന്‍റെ ദേശീയ- അന്തർദേശീയ നയങ്ങളെ അപമാനിച്ചാൽ 50,000 തൽ 500,000 ദിർഹം വരെ. വിദേശ രാജ്യങ്ങളുമായുള്ള ബന്ധത്തെ ദോഷകരമായി ബാധിക്കുന്നതോ ദേശീയ ഐക്യം, സാമൂഹിക ഐക്യം എന്നിവ തകർക്കുന്നതോ ആയ ഉള്ളടക്കം പ്രസിദ്ധീകരിച്ചാൽ 250,000 ദിർഹം വരെ.

ഡിജിറ്റൽ, പരമ്പരാഗത മാധ്യമങ്ങളിൽ സുതാര്യതയും ഉത്തരവാദിത്തവും ഉറപ്പാക്കുന്നതിന് മാധ്യമ പ്രവർത്തകരെയും ഇൻഫ്ലുൻസർമാരെയും സംരക്ഷിക്കുന്ന വ്യവസ്ഥകളും പുതിയ നിയമത്തിൽ ഉൾപ്പെടുന്നു.

ലൈസൻസ് ലംഘനങ്ങൾ

ലൈസൻസ് ഇല്ലാതെ മാധ്യമ പ്രവർത്തനം നടത്തിയാൽ ആദ്യ ലംഘനത്തിന് 10,000 ദിർഹം. ആവർത്തിച്ചാൽ 40,000 ദിർഹം.

കാലാവധി കഴിഞ്ഞ് 30 ദിവസത്തിനുള്ളിൽ ലൈസൻസ് പുതുക്കാതിരുന്നാൽ പ്രതിദിനം 150 ദിർഹം, പരമാവധി 3,000 ദിർഹം.

ലൈസൻസ് കൈമാറ്റം ചെയ്യുക, പങ്കാളിയെ ചേർക്കുകയോ മാറ്റുകയോ ചെയ്യുക , അല്ലെങ്കിൽ അംഗീകാരമില്ലാതെ വിശദാംശങ്ങൾ മാറ്റുക: 20,000 വരെ പിഴ.

കാലഹരണപ്പെട്ട ലൈസൻസ് ഉപയോഗിച്ച് പ്രസിദ്ധീകരണം തുടർന്നാൽ ആദ്യ തവണ 10,000 ദിർഹം. ആവർത്തിച്ചാൽ 20,000 ദിർഹം.

വ്യാജ വിവരങ്ങളും തെറ്റായ വിവരങ്ങളും പ്രചരിപ്പിച്ചാൽ ആദ്യ തവണ 5,000 ദിർഹം. ആവർത്തിച്ചാൽ 10,000 ദിർഹം.

ഇവന്‍റ്, പ്രസിദ്ധീകരണ ലംഘനങ്ങൾ അനുമതി ഇല്ലാതെ പുസ്തകമേള സംഘടിപ്പിച്ചാൽ 40,000 ദിർഹം.

ആവർത്തിച്ചാൽ ഇരട്ടി തുക.

ലൈസൻസ് ഇല്ലാതെ മാധ്യമ ഉള്ളടക്കം അച്ചടിക്കുകയോ, പ്രചരിപ്പിക്കുകയോ, അല്ലെങ്കിൽ പ്രസിദ്ധീകരിക്കുകയോ ചെയ്‌താൽ 20,000 ദിർഹം. ആവർത്തിച്ചാൽ ഇരട്ടി തുക പിഴ.

വിദേശ കറസ്‌പോണ്ടന്‍റുകൾ

ലൈസൻസില്ലാതെ വിദേശ കറസ്‌പോണ്ടന്‍റായി ജോലി ചെയ്താൽ പരമാവധി 3 രേഖാ മൂലമുള്ള മുന്നറിയിപ്പുകൾ നൽകും. ആവർത്തിച്ചാൽ 10,000 ദിർഹം പിഴ ചുമത്തുന്നതാണ്.

ഈ വർഷത്തെ ബലി പെരുന്നാൾ ദിനത്തോട് അനുബന്ധിച്ച് നടക്കുന്ന മലയാളം ഈദ് ഗാഹ് ദുബായ് അൽ ഖിസൈസിലെ വുഡ് ലം പാർക്ക് സ്കൂളിൽ നടക്കും. ദുബായ് മതകാര്യ വകുപ്പിന്‍റെ കീഴിൽ നടത്തുന്ന ഈദ് നമസ്കാരത്തിന് മസ്‌ജിദ്‌ അൽ അൻസാർ (ജബൽ അലി) ഇമാം സാജിദ് ബിൻ ഷരീഫ് നേതൃത്വം നൽകും.

ഈദ് ഗാഹിൽ പങ്കെടുക്കുന്ന കുട്ടികൾക്ക് പ്രത്യേകം മത്സരങ്ങളും സമ്മാനങ്ങളും ഒരുക്കിയിട്ടുണ്ട്. സ്ത്രീകൾക്ക് പ്രാർഥനയിൽ പങ്കെടുക്കാൻ ലഘു ഭക്ഷണം, പാർക്കിങ് അടക്കമുള്ള പ്രത്യേക സൗകര്യങ്ങൾ കൂടി ഒരുക്കിയിട്ടുണ്ടെന്ന് സംഘാടക സമിതി അറിയിച്ചു.

പുലർച്ചെ 05:45 നാണ് ഈദ് നിസ്കാരം ആരംഭിക്കുക. പ്രാർഥനക്ക് എത്തുന്നവർ മുസല്ല കൈയിൽ കരുതി വുദു എടുത്ത് കൃത്യ സമയത്ത് എത്തണമെന്ന് സംഘാടകർ അറിയിച്ചു. കൂടുതൽ വിവരങ്ങൾക്ക് വിളിക്കേണ്ട നമ്പർ ‪+971 551828616