ദുബായ്: നല്ല പെരുമാറ്റങ്ങളെ പ്രോത്സാഹിപ്പിക്കുകയും സമൂഹത്തിൽ പരസ്പര ബഹുമാനത്തിന്റെയും സൗഹൃദത്തിന്റെയും സംസ്കാരം ശക്തിപ്പെടുത്തുകയും ചെയ്യുന്നതിന്റെ ഭാഗമായി “ഐഡിയൽ ഫേസ് രണ്ടാം ഘട്ടത്തിന്” ദുബായിൽ തുടക്കമായി. ഇതിന്റെ ഭാഗമായി ദുബായ് ഇന്റർനാഷണൽ എയർപോർട്ടിൽ ഒരു പ്രത്യേക ബൂത്ത് തുറന്നു. ദുബായിലെ ജനറൽ ഡയറക്ടറേറ്റ് ഓഫ് ഐഡന്റിറ്റി ആൻഡ് ഫോറിനേഴ്‌സ് അഫയേഴ്‌സ് (GDRFA) ആണ് ഈ സംരംഭത്തിന് പിന്നിൽ. ജി ഡി ആർ എഫ് എ മേധാവി ലഫ്റ്റനന്റ് ജനറൽ മുഹമ്മദ് അഹമ്മദ് അൽ മർറി ബൂത്തിന്റെ ഉദ്ഘാടനം നിർവഹിച്ചു.

ഇതാണ് നമ്മൾ ആഗ്രഹിക്കുന്ന ദുബായ്” എന്ന പ്രമേയത്തിലാണ് ഈ സംരംഭം നടപ്പിലാക്കുന്നത്. ദുബായ് ഒരു മാതൃകാപരമായ നഗരമാണെന്ന് ഉറപ്പിക്കാനും, ഇവിടെയുള്ള ഓരോ വ്യക്തിയുടെയും നല്ല മനസ്സുകളെ ആദരിക്കാനുമാണ് ഈ സംരംഭം ആരംഭിച്ചത്.ദുബായ് എയർപോർട്ട്‌സ് ചീഫ് ഓപ്പറേറ്റിംഗ് ഓഫീസർ മാജെദ് അൽ ജോക്കർ, ജി ഡി ആർ എഫ് എ ദുബായ് ഡെപ്യൂട്ടി ഡയറക്ടർ ജനറൽ മേജർ ജനറൽ ഒബൈദ് മുഹൈർ ബിൻ സുറൂർ, ജി ഡി ആർ എഫ് എ ദുബായിലെ നിരവധി ഉന്നത ഉദ്യോഗസ്ഥർ, ദുബായ് എയർപോർട്ട്‌സ് സീനിയർ വൈസ് പ്രസിഡന്റ് – പാസഞ്ചർ ടെർമിനൽ ഓപ്പറേഷൻസ് എസ്സ അൽ ഷംസി തുടങ്ങിയവർ കഴിഞ്ഞ ദിവസം സംരംഭത്തിന്റെ പ്ലാറ്റ്‌ഫോം സന്ദർശിച്ചു. ഇവിടത്തെ വിവിധ വിഭാഗങ്ങളിലെ സംവേദനാത്മക പ്രവർത്തനങ്ങളെക്കുറിച്ചും അത് സമൂഹത്തിൽ നേടിയെടുത്ത പങ്കാളിത്തത്തെക്കുറിച്ചും അധികൃതർ അവർക്ക് വിശദീകരണം നൽകി.

ഐഡിയൽ ഫേസ് 2″ ബൂത്ത് 2025 ജൂലൈ 1 മുതൽ ജൂലൈ 13 വരെ ദുബായ് എയർപോർട്ടിലെ ടെർമിനൽ 3-ലെ ഡിപ്പാർച്ചർ വിഭാഗത്തിൽ എല്ലാ ദിവസവും സന്ദർശകരെ സ്വാഗതം ചെയ്യും. സംരംഭത്തിന്റെ ലക്ഷ്യങ്ങൾ അറിയാനും, മാനുഷിക മൂല്യങ്ങൾ സ്വന്തം പ്രവൃത്തികളിലൂടെ പ്രകടിപ്പിച്ച വ്യക്തികളുടെ യഥാർത്ഥ ജീവിത കഥകൾ രേഖപ്പെടുത്തുന്നത് ഉൾപ്പെടെയുള്ള പ്രവർത്തനങ്ങളിൽ പങ്കെടുക്കാനും, ദുബായിയുടെ നല്ല പെരുമാറ്റച്ചട്ടം പാലിക്കുമെന്ന് പ്രതിജ്ഞയെടുക്കാനും അതുവഴി പരസ്പര ബഹുമാനത്തിന്റെ സംസ്കാരം പ്രചരിപ്പിക്കാനും പൊതുജനങ്ങൾക്ക് ബൂത്തിൽ അവസരം ലഭിക്കും.സന്ദർശകർക്ക് പദ്ധതിയുമായി ബന്ധപ്പെട്ട വിവിധ ചോദ്യങ്ങൾക്ക് ഉത്തരം നൽകാനും തത്സമയ സംവേദനം നടത്താനും അവസരമുണ്ട്. നല്ല പെരുമാറ്റം കാഴ്ചവെച്ച വ്യക്തികൾക്ക് “ഐഡിയൽ ഫേസ് – ഇതാണ് നമ്മൾ ആഗ്രഹിക്കുന്ന ദുബായ്” എന്ന സന്ദേശം ആലേഖനം ചെയ്ത ഒരു നന്ദി കാർഡ് നൽകുന്നതാണ്.

യു.എ.ഇയുടെ സാമൂഹിക മൂല്യങ്ങൾ വളർത്തുന്നതിനുള്ള കാഴ്ചപ്പാടിന്റെ പ്രായോഗിക രൂപീകരണമാണ് ഈ പ്ലാറ്റ്‌ഫോം എന്ന് ലഫ്റ്റനന്റ് ജനറൽ മുഹമ്മദ് അഹമ്മദ് അൽ മർറി അഭിപ്രായപ്പെട്ടു. ഇത് നല്ല പെരുമാറ്റങ്ങളെ ആദരിക്കുകയും ആഘോഷിക്കുകയും ചെയ്യുന്ന ഒരു സംവേദനാത്മക അനുഭവം ഒരുക്കുന്നു. ഇത് മനുഷ്യ കേന്ദ്രീകൃത ഇടപെടലുകളിൽ ദുബായുടെ ആഗോള മാതൃകയെ പ്രതിഫലിക്കുന്നുവെന്നും അദ്ദേഹം കൂട്ടിച്ചേർത്തു.ജനറൽ ഡയറക്ടറേറ്റ് ഓഫ് ഐഡന്റിറ്റി ആൻഡ് ഫോറിനേഴ്‌സ് അഫയേഴ്‌സ് ദുബായ് സമൂഹത്തിലെ അംഗങ്ങളുമായി നേരിട്ടുള്ള ആശയവിനിമയം ശക്തിപ്പെടുത്തുന്നതിനുള്ള പ്രതിബദ്ധതയുടെ പ്രതിഫലനമായാണ് ഈ പ്ലാറ്റ്‌ഫോം ആരംഭിച്ചത്.

സന്ദർശകർക്ക് അവരുടെ അഭിപ്രായങ്ങളും പ്രതികരണങ്ങളും പങ്കിടാൻ കഴിയുന്ന ഒരു സംവേദനാത്മക ഇടമായാണ് ഇത് രൂപകൽപ്പന ചെയ്തിരിക്കുന്നത്. ഇത് അവരുടെ അഭിലാഷങ്ങൾ ശ്രദ്ധാപൂർവ്വം കേൾക്കാൻ സഹായിക്കുന്നു. ജനങ്ങളെ മുൻഗണനകളിൽ ഉൾപ്പെടുത്താനാണ് ഈ സംരംഭം ലക്ഷ്യമിടുന്നത്, ജീവിതനിലവാരം വർദ്ധിപ്പിക്കുന്നതിനും പ്രതികരിക്കുന്നതും കാര്യക്ഷമവും സമൂഹ കേന്ദ്രീകൃതവുമായ സേവനങ്ങൾ നൽകുന്നതിനുള്ള ദുബായിയുടെ കാഴ്ചപ്പാടിനോടുള്ള ഡയറക്ടറേറ്റിന്റെ പ്രതിബദ്ധത ഇത് വീണ്ടും ഉറപ്പിക്കുന്നു.ദുബായ് വിമാനത്താവളത്തിലെ ഫിസിക്കൽ പ്ലാറ്റ്‌ഫോമിലൂടെയും ഔദ്യോഗിക പേജിലൂടെ ഡിജിറ്റൽ വഴിയും ഈ സംരംഭത്തിൽ സംഭാവനകളും പ്രതിജ്ഞകളും നടത്താം. വ്യക്തികൾക്ക് അവരുടെ മനുഷ്യ കേന്ദ്രീകൃത നിമിഷങ്ങൾ പങ്കുവെച്ചോ ദുബായിയുടെ സിവിലിയൻ മനോഭാവത്തെ പ്രതിഫലിക്കുന്ന തത്വങ്ങൾ ഉയർത്തിപ്പിടിക്കുമെന്ന് പ്രതിജ്ഞയെടുത്തോ ഇതിൽ പങ്കാളികളാകാൻ കഴിയുന്നതാണ്.